Israel Saria
Ushindani mkubwa wa soka mara nyingi hutegemea zaidi hisia kuliko takwimu. Katika historia ya Ligi Kuu ya England, ni misimu minne tu ambayo Manchester City na Liverpool walimaliza katika nafasi mbili za juu kwa pamoja. Hata hivyo, kwa sehemu kubwa ya muongo ambao Pep Guardiola amekuwa City, ilionekana kana kwamba soka la England lilitawaliwa na mapambano kati yake na Jürgen Klopp, pamoja na mitindo ya mchezo iliyokua kutokana na kila mmoja kujifunza kutoka kwa mwenzake.
Sasa Klopp ameondoka, na si ajabu kama Guardiola (au hata Arne Slot) ataondoka pia katika majira yajayo. Enzi ambazo timu zote mbili zilivuka alama ya pointi 90 zinaonekana kupita. Zote ziko katika kipindi cha mpito, zikijenga upya vikosi kwa zama mpya ambazo bado hazijajitokeza kikamilifu, na hivyo ushindani wao umepungua. Liverpool wako nje ya mbio za ubingwa, na kushindwa kwa City Anfield kunaweza pia kuwatoa kwenye mbio hizo.
Tatizo la “mapinduzi” ya Guardiola na Klopp labda ni kwamba yalifanikiwa sana. Timu nyingi sasa zimekubali misingi ya uchezaji wao: presha ya juu, umiliki wa mpira ili kuunda faida ya idadi ya wachezaji (overloads), na mpangilio wa kisasa wa mbinu. Wakati kila mtu anapofuata kanuni hizo, hazionekani tena kama mapinduzi bali hali ya kawaida. Swali kubwa sasa ni: nini kitafuata?
Cha kushangaza ni kwamba, wakati klabu nyingi zimefuata mfano wa Mikel Arteta kwa kusisitiza udhibiti wa mchezo na mipira ya adhabu (set pieces), City na Liverpool hawajachukua mwelekeo huo kikamilifu. Guardiola mwenyewe alishawahi kusema kwamba “soka la kisasa” linaonyeshwa zaidi na timu kama Bournemouth, Brighton na Newcastle — akimaanisha kasi ya kubeba mpira na kubadilika kulingana na mwenendo wa mchezo, hasa katika ratiba ngumu ya mechi nyingi.
Mabadiliko hayo yameonekana City, kwa mfano kupitia usajili wa Erling Haaland — mshambuliaji wa jadi ambaye hakuhusika sana katika umiliki wa mpira — ili kuvunja utaratibu uliokuwa unaonekana kuwa wa kutabirika. Ingawa iliwasaidia kushinda treble, usajili mwingine kama Gianluigi Donnarumma, Rayan Cherki na Rayan Aït-Nouri unaonyesha jaribio la kujaribu mtindo tofauti, ingawa bado haijulikani kama mwelekeo huo unaeleweka kikamilifu.
Matokeo yake, City wakati mwingine wamecheza kwa umiliki mdogo wa mpira kuliko ilivyozoeleka, lakini bado hawajapata uthabiti. Jaribio lao la kutumia safu ya ulinzi ya juu na mtego wa kuotea (offside trap) limewaacha hatarini dhidi ya mipira mirefu nyuma ya mabeki, na pia linahitaji nguvu nyingi za mwili, jambo linaloweza kueleza kwa nini mara nyingi hupungua nguvu kipindi cha pili.
Liverpool pia hawajaonyesha picha iliyo wazi ya mwelekeo mpya. Usajili wa washambuliaji wawili bila kushughulikia mapungufu makubwa katikati ya uwanja na safu ya ulinzi umeacha maswali kuhusu mkakati wao wa muda mrefu.
Kwa hiyo, mchezo ambao hapo awali ulikuwa kilele cha soka la England — ukikumbukwa mechi za kusisimua za 2017-18 — sasa umebadilika sura. Klabu mbili ambazo ziliongoza dunia kwa matokeo na mtindo wa uchezaji sasa ziko katika kipindi cha kutafuta mwelekeo mpya, zikijaribu kugundua mustakabali wao na namna ya kuongoza zama zijazo za soka.
Comments
Loading…