Israel Saria
miaka yao ya uchambuzi wa soka: “Walikuwa kama wamerogwa”
Kama ungekuwa unatafuta kocha wa kuwania nafasi za Ligi ya Mabingwa, huenda matangazo ya Sky Sports ya English Football League (EFL) yasingekuwa mahali pa kwanza pa kuangalia.
Lakini kama ungekuwa unatazama matangazo yao ya mechi ya Norwich City dhidi ya Blackburn Rovers mwezi Aprili 2019, hapo ndipo ungeweza kuwakuta wawili hawa.
Wakati huo, Liam Rosenior na Keith Andrews walikuwa wachambuzi wa kawaida wa televisheni, wakiwa bado karibu na maisha yao ya uchezaji, wakitumia uzoefu wa jumla ya misimu 25 waliyoicheza EFL — mfumo wa ligi tatu zilizo chini ya Ligi Kuu, zikiwemo Championship (daraja la pili), League One (la tatu) na League Two (la nne).
Sasa, Rosenior na Andrews ni makocha wakuu wa timu za Ligi Kuu: Chelsea na Brentford kwa pamoja, na wanakutana uso kwa uso Stamford Bridge wikendi hii, wakiwa wanatofautiana kwa pointi mbili tu kwenye msimamo wa ligi huku wakipambana kuwania nafasi ya Ligi ya Mabingwa msimu ujao.
Kwa namna fulani, hili linafanana kabisa na katuni maarufu ya Paul Rudd iliyo hai: watu wawili waliostaajabishwa kidogo wakitazamana na kusema, “Tazama tulipofika! Nani angefikiria? Mimi siye!”
Lakini kwa wale waliowahi kufanya kazi nao kwenye vipindi vya Sky, huenda kilichowashangaza ni kasi ya mafanikio yao — siyo ukweli kwamba wamefika hapo.
Wote wawili tayari walikuwa kwenye kazi za ukocha wakati huo — Rosenior akiwa na timu za vijana za Brighton, Andrews akiwa MK Dons, kisha timu ya Under-21 ya Jamhuri ya Ireland na baadaye timu ya taifa ya wakubwa. Swali lilikuwa: je, ilionekana mapema kuwa wangekuwa makocha wakuu, siyo “makocha tu”?
“Jibu fupi na rahisi ni: ndiyo,” anasema Jobi McAnuff, mchambuzi mwenzake wa EFL aliyekaa nao mara nyingi.
“Wote walikuwa na lengo na ndoto ya kuwa namba moja. Fursa ya Keith ilikuja mapema zaidi kuliko alivyotarajia, hasa kwenye Ligi Kuu, lakini Brentford wamekuwa makini sana kwenye uteuzi wao wa makocha. Wanafanya maamuzi ya makusudi kabisa.”
Wawili hao waliingizwa kwenye vipindi vya Sky ili kuleta upepo mpya kwenye uchambuzi wa EFL mwaka 2016 na 2017.
Andrews alipata nafasi baada ya kuvutia kwenye kipindi cha Goals On Sunday, akipendekezwa na Chris Kamara. Rosenior alitajwa wakati Sky walipokuwa wakizungumza na Brighton, ambako alikuwa bado mchezaji (ingawa tayari alikuwa amemaliza leseni zake za ukocha).
Alifanya vizuri sana kwenye mahojiano yake ya awali kiasi kwamba watayarishaji walikuwa wakimtania aache soka mapema ili apatikane mara kwa mara zaidi. Kufikia msimu wa 2017-18, alikuwa tayari mchambuzi wa kudumu.
Ukweli kwamba wote walikuwa tayari wakifanya ukocha ulikuwa sababu kubwa Sky kuwachukua, kwa kuwa walitaka wachambuzi waliokuwa wakifikiria mchezo kwa undani wa kiufundi, siyo wale wa kauli za juu juu kama baadhi ya wachambuzi wetu uchwara.
“Ukocha unakupa mtazamo tofauti kabisa wa mchezo,” anasema McAnuff.
“Unaona undani zaidi, unaelewa kwa urahisi kilichotokea. Shabiki anaweza kuona mchezaji ana mpira sana, lakini haoni kama hilo lilipangwa au lilifanyiwa kazi mazoezini.”
“Changamoto kama mchambuzi ni kutozama sana kwenye undani wa kitaalamu unapojaribu kueleza kwa watazamaji wa nyumbani.”
David Prutton, mtangazaji wa EFL Sky na mchezaji wa zamani wa Southampton na Nottingham Forest, anakumbuka vizuri:
“Nilichogundua kwa hao wawili ni kwamba walikuwa wamevutiwa sana na kile kilichokuwa kinaendelea — karibu kama wamerogwa. Uliona akili zao zikifanya kazi, wakijaribu kuchambua kila kinachoendelea.”
Walivutia hata wachambuzi wenzao. Darren Bent alisema hivi hivi karibuni kwenye talkSPORT:
“Ukiwa unakaa nao na kuzungumza kuhusu jinsi timu zinavyocheza na wanavyozungumzia mbinu… naapa, akili yako inalipuliwa.”
Kwa tabia, Andrews na Rosenior wanafanana: watu watulivu, werevu, wasio na makelele — si wale wa kauli kali kwa ajili ya mitandao ya kijamii.
“Utulivu wao ndio unaonekana zaidi,” anasema Prutton.
“Wamepimika sana,” anaongeza McAnuff. “Katika tasnia ambayo kupiga kelele ni kawaida, wao walikuwa na jicho la kiufundi zaidi.”
Kwa kweli, hawakuonekana pamoja mara nyingi kwa sababu Sky waliwaona kuwa wachambuzi bora kabisa wa EFL, walioweza kubeba kipindi peke yao. Hivyo, waliunganishwa tu kwenye mechi kubwa kama mchezo wa kwanza wa Frank Lampard akiwa kocha wa Derby County au mechi za play-off.
Mchambuzi mwingine aliyekuwa akipendwa kipindi hicho alikuwa Gary O’Neil, ambaye naye ni sehemu ya simulizi hili — akiwa amechukua nafasi ya Rosenior Strasbourg, na labda, kwa mwendo huu, ndiye “aliyechaguliwa” awe kocha wa Chelsea.
Kuna mzaha kwamba sofa ya Sky Sports EFL ndiyo njia ya mkato ya kupata kazi ya ukocha, lakini ukweli ni kwamba vilabu vinaangalia. Maonekano ya Rosenior kwenye TV yalivutiwa na mmiliki wa Derby wakati huo, Mel Morris, na yakachangia yeye kuajiriwa kwenye benchi la ufundi mwaka 2019.
Wale wanaoonekana kwenye TV wanajua wazi kuwa waajiri watarajiwa wanaangalia.
Muhimu zaidi, wote walijifunza kupitia EFL, kazi ngumu zaidi kuliko mashindano makubwa yenye watazamaji wengi wasio na upendeleo.
Huwezi “kuotea” EFL. Mashabiki wa Bristol City dhidi ya Preston North End wanajua timu zao kwa undani.
Kwa Rosenior na Andrews kufanikiwa hapo, iliwabidi kufanya utafiti wa kina.
Kuna tofauti kubwa kati ya uchambuzi na ukocha, lakini kuna mambo yanayofanana — hasa mawasiliano.
Kuweza kueleza mawazo yako kwa ufupi, kwa uwazi na kwa wakati mfupi ni jambo la msingi.
“Changamoto kubwa kwenye TV ni muda,” anasema McAnuff.
“Na kwenye mikutano ya timu, umakini wa wachezaji ni mdogo — kuna mwingiliano mkubwa.”
Ni nani ajuaye kama Rosenior atafanikiwa Chelsea, au kama mwanzo mzuri wa Andrews Brentford utaendelea, lakini ukitazama walipotoka, safari yao ni ya kushangaza.
Makocha hutokea sehemu zisizotarajiwa.Labda ni wakati wa kuanza kuangalia kwa jicho la pili sofa ya Sky Sports EFL.
Comments
Loading…