Israel Saria
Klabu ya Chelsea F.C. imepigwa faini ya pauni milioni 10 na Premier League baada ya kubainika kukiuka kanuni za kifedha wakati wa umiliki wa aliyekuwa mmiliki wake, Roman Abramovich.
Ligi hiyo pia imeipa Chelsea adhabu ya kufungiwa kusajili wachezaji wa kikosi cha kwanza kwa mwaka mmoja, lakini adhabu hiyo imesimamishwa kwa kipindi cha miaka miwili. Hii ina maana kwamba klabu hiyo bado inaweza kusajili wachezaji ikiwa haitafanya ukiukaji mwingine wowote katika kipindi hicho. Hakuna adhabu ya kimichezo kama kupunguziwa pointi iliyotolewa.
Mbali na hilo, Chelsea imepigwa marufuku kusajili wachezaji wa akademi kutoka klabu nyingine za Premier League na English Football League kwa muda wa miezi tisa kuanzia sasa. Hata hivyo, marufuku hiyo haiwahusu wachezaji waliopo tayari kwenye akademi ya klabu hiyo wala wachezaji wa kimataifa.
Uchunguzi wa ligi ulibaini kuwa kati ya mwaka 2011 na 2018, Chelsea ililipa zaidi ya pauni milioni 23 kwa mawakala ambao hawakusajiliwa rasmi au taasisi zinazohusiana nao katika usajili wa wachezaji kadhaa, wakiwemo Eden Hazard, David Luiz, Andre Schurrle, Nemanja Matic na Ramires. Kwa jumla, zaidi ya pauni milioni 47 zilihusishwa na malipo hayo kwa watu au kampuni 12.
Chelsea ndiyo iliyoripoti yenyewe taarifa hizo kwa UEFA na The Football Association pamoja na Premier League, jambo lililochangia kupunguza adhabu. Bila ushirikiano huo, adhabu ingeweza kuwa kali zaidi, ikiwa ni pamoja na kufungiwa usajili kwa dirisha mbili za usajili na faini ya pauni milioni 20.
Akizungumza kuhusu suala hilo, kocha wa Chelsea Liam Rosenior alisema adhabu hiyo haitakuwa kikwazo kwa timu yake.
“Nadhani sasa tumefunga ukurasa wa suala hili. Tunaweza kuendelea mbele na kupanga kuifanya klabu hii kuwa imara zaidi kwa siku zijazo,” alisema.
Licha ya matatizo hayo ya kifedha, Chelsea ilipata mafanikio makubwa katika kipindi hicho, ikitwaa mataji ya Premier League mara mbili pamoja na UEFA Champions League na UEFA Europa League.
Hata hivyo, klabu hiyo bado inakabiliwa na uchunguzi mwingine wa The Football Association unaohusiana na madai ya ukiukaji wa kanuni za malipo kwa mawakala kati ya mwaka 2009 na 2022
Comments
Loading…