Israel Saria
*Liver wawapiga Man U Europa*
Wakati Manchester United wamelala mbele ya Liverpool katika mchezo wa
Ligi ya Europa, vigogo wengine wa England, Chelsea wametolewa katika
Ligi ya Mabingwa Ulaya (UCL).
Ndoto za Chelsea na kocha wa wa mpito, Guus Hiddink kusonga mbele na
labda kutwaa ubingwa wa Ulaya zilikatishwa kikatili katika hatua ya 16
bora na Paris Saint-Germain (PSG) wakiongozwa na Zlatan Ibrahimovic.
Japokuwa Chelsea walikuwa wakicheza nyumbani Stamford Bridge,
walishindwa kufurukuta huku wageni wakiingia wakiwa kifua mbele
wakijivunia kuwa na utangulizi wa mabao 2-1 kwenye mechi ya mkondo wa
kwanza.
Ibrahimovic alitoa pasi maridhawa kwa Adrien Rabiot aliyecheka na
nyavu karbu kabisa na lango katika dakika ya 16 tu.
Diego Costa alifanya vyema kuwafanya Chelsea kuwa sare huku
wakitarajia kupata mabao zaidi lakini alipotoka uwanjani kutokana na
majeraha na Ibrahimovic kufunga bao la pili, ilikuwa msumari wa mwisho
kwenye jeneza la Chelsea.
Alikuwa mchezaji wa zamani wa Manchester United, Angel di Maria
aliyempa pasi nzuri Ibrahimovic na kuwafanya PSG kutinga robo fainali
ya michuano hiyo.
Chelsea wanaoshika nafasi ya 10 kwenye msimamo wa Ligi Kuu ya England
wanaweza wasishiriki michuano yoyote ya Ulaya msimu ujao, tena Costa
na Eden Hazard wakiumia kabla ya mechi ya robo fainali ya Kombe la FA
dhidi ya everton Jumamosi hii.
LIVERPOOL WAWAPIGA MAN U EUROPA
Manchester United wamepoteza moto wao kwenye Ligi ya Europa baada ya
kukubali kichapo cha 2-0 kutoka kwa Liverpool.
Kiungo wa zamani wa United, Paul Scholes amesema kwamba Mashetani
Wekundu walikuwa hovyo sana kwenye mechi hiyo, akiendeleza
mashambulizi yake dhidi ya kocha Louis van Gaal.
Ilikuwa United wapokee kichapo zaidi kama si kipa wao, David de Gea
kujitahidi kuzuia mabao mengine, lakini akashindwa yale ya Daniel
Sturridge na Roberto Firmino.
Hiyo ilikuwa mechi ya mkondo wa kwanza na United watajua hatima yao
watakapowakaribisha Liverpool Old Trafford kwa mechi ya mkondo wa pili
Alhamisi ijayo.
Scholes alieleza mshangao wake kwa klabu yake hiyo ya zamani kupigwa
hovyo, akisema wana kiwango chao cha juu wanachotakiwa kukihakikisha
na kwamba wanatakiwa kuwania ubngwa wa England na wa Ulaya.
Walitupwa kwenye Ligi ya Europa, ligi ndogo tu, baada ya kumaliza
wakiwa wa tatu kwenye kundi lao la UCL, na wenzao waliobimbirika nao
kutoka huko juu ni Wolfsburg, PSV Eindhoven na CSKA Moscow.
