Israel Saria
Arsenal wameandika historia mpya baada ya kutinga fainali ya Ligi ya Mabingwa Ulaya kufuatia ushindi muhimu dhidi ya Atlético Madrid katika nusu fainali iliyokuwa na ushindani mkubwa.
Katika mchezo huo uliokuwa na presha na msisimko wa hali ya juu, kikosi cha kocha Mikel Arteta kilionyesha uimara na nidhamu ya hali ya juu, hasa katika safu ya ulinzi. Bao pekee la ushindi lilifungwa na nyota wa timu hiyo, Bukayo Saka, mwishoni mwa kipindi cha kwanza baada ya kipa wa Atlético, Jan Oblak, kushindwa kudhibiti mpira uliopigwa na Leandro Trossard.
Ushindi huo unaifanya Arsenal kufika fainali yao ya pili katika historia ya michuano hiyo, ikiwa ni mara ya kwanza tangu mwaka 2006. Sasa wanasubiri kumenyana na aidha Paris Saint-Germain au Bayern Munich katika mchezo wa fainali utakaopigwa Budapest tarehe 30 Mei.
Kwa upande wa Atlético, waliokuwa chini ya Diego Simeone, walijitahidi kusawazisha hasa katika kipindi cha pili lakini walikwama kuvunja ngome imara ya Arsenal. Nafasi ya wazi zaidi ilipotezwa na Alexander Sørloth katika dakika za mwisho wa mchezo.
Mashabiki wa Arsenal walishuhudia ushindi huo muhimu kwa furaha kubwa, huku kocha Arteta akionekana kushindwa kuficha hisia zake baada ya filimbi ya mwisho.
Kwa sasa, Arsenal wana matumaini makubwa ya kutwaa taji hilo, sambamba na harakati zao za kuwania ubingwa wa Ligi Kuu England.
Comments
Loading…