Israel Saria
Arsenal yajipanga kuongeza kasi ya mashambulizi, kubadili mfumo wa kiungo na kuimarisha ushindani wa safu ya ushambuliaji.
Mabingwa wa Ligi Kuu England, Arsenal, wanarejea rasmi uwanjani kuanza maandalizi ya msimu mpya kwa mchezo wa kirafiki dhidi ya Girona nchini Hispania, huku kocha Mikel Arteta akitarajiwa kutumia kipindi hiki kuboresha maeneo muhimu yatakayowasaidia kutetea ubingwa wao.
Baada ya kutwaa taji la Premier League msimu wa 2025-26, Arsenal sasa wanalenga kuwa timu yenye nguvu zaidi, hasa katika eneo la kiungo, mashambulizi ya kasi na ushindani wa nafasi ya mshambuliaji.
Mapinduzi katikati ya uwanja
Arteta anatarajiwa kupunguza mzigo kwa Declan Rice na Martin Zubimendi, ambao walicheza dakika nyingi zaidi msimu uliopita.
Hii inaweza kufungua nafasi kwa chipukizi Myles Lewis-Skelly na Ethan Nwaneri kupata nafasi kubwa zaidi, huku Arteta akitarajiwa kuendelea na majaribio ya mfumo unaompa nahodha Martin Ødegaard uhuru mkubwa wa kuongoza mashambulizi.
Mashambulizi ya kasi yawe kipaumbele
Moja ya changamoto kubwa kwa Arsenal msimu uliopita ilikuwa kushindwa kutumia vizuri mashambulizi ya kushtukiza.
Licha ya kutwaa ubingwa, mara nyingi walichelewa kusonga mbele walipopata nafasi za kufanya mashambulizi ya haraka.
Usajili wa Christos Tzolis unatarajiwa kuongeza kasi upande wa kushoto, huku taarifa zikieleza Arsenal bado wanaendelea kutafuta winga mwingine mwenye kasi zaidi ili kuimarisha safu yao ya ushambuliaji.
Gyökeres au Havertz?
Swali kubwa litakalojibiwa katika maandalizi haya ni nani atakuwa mshambuliaji namba moja kati ya Viktor Gyökeres na Kai Havertz.
Kwa mara ya kwanza baada ya muda mrefu, wote wawili wameanza maandalizi wakiwa fiti, jambo linalompa Arteta chaguzi nyingi zaidi.
Kocha huyo anaweza kuamua kuanza na mmoja kulingana na aina ya mpinzani, au hata kuwachezesha wote kwa pamoja ili kuongeza nguvu ya mashambulizi.
Lengo ni mabao mengi zaidi
Arsenal walifunga mabao 71 katika safari yao ya kutwaa ubingwa, lakini bado idadi hiyo iko chini ya mabao 91 waliyofunga msimu wa 2023-24.
Arteta anaamini kuongeza kasi ya mashambulizi, kutumia vizuri kikosi chake na kuwafanya washambuliaji wake kuwa na ushindani mkubwa kutawafanya Arsenal kuwa hatari zaidi msimu huu.
Iwapo mipango hiyo itafanikiwa, mabingwa hao wanaweza kuwa katika nafasi nzuri ya kutetea ubingwa wa Premier League na pia kufanya vizuri zaidi kwenye mashindano ya Ulaya.
Comments
Loading…