Sakuru Na Deni Zito Kwa Simba Ya Fadlu

Klabu ya soka ya Simba kutoka hapa nchini Tanzania kupitia kurasa zake za mitandao ya kijamii imetangaza kumteua Zubeda Hassan Sakuru kuwa Kaimu Mtendaji Mkuu wa klabu hiyo. Hatua hii imepokelewa kwa hisia mchanganyiko kutoka Kwa wadau wa soka lakini pia na wanachama wa Klabu ya soka na hii ikichochewa na historia ya kipekee ya Zubeda ndani ya Simba na matarajio makubwa kutoka kwa mashabiki wa klabu hiyo. Historia ya Zubeda Hassan Sakuru na Simba SC

Kwa ambao labda hawafahamu tu ni kwamba Sakuru si jina geni ndani ya familia ya wekundu wa msimbazi. Ni mmoja wa wanachama wa muda mrefu wa klabu hiyo na ameongoza idara mbalimbali ndani ya Simba, ikiwemo ya Meneja Miradi ya klabu ya Simba pamoja na usimamizi wa masuala ya uendeshaji wa klabu na utawala. Uwezo wake wa kusimamia masuala ya kifedha, uendeshaji wa timu, na mikakati ya maendeleo umemfanya kuwa mmoja wa watu wanaoheshimika sana katika uongozi wa Simba.

Zubeda ameonyesha ukomavu na uelewa wa mazingira ya Simba, jambo linalomhakikishia nafasi ya kushika wadhifa huu. Kwa kipindi chote cha kazi yake ndani ya Simba, amekuwa akihusika moja kwa moja na mipango ya maendeleo ya klabu, ikiwa ni pamoja na usimamizi wa miradi ya kiuchumi na mikakati ya kuongeza mapato. Hii inampa fursa ya kuelewa changamoto za sasa za Simba na njia za kuzitatua.

Jukumu la Zubeda lina changamoto nyingi, hasa kwa kuzingatia matarajio ya mashabiki wa Simba ambao wana njaa ya mafanikio makubwa si tu katika ligi ya ndani bali pia kimataifa. Kwa kuwa mwanamke wa pili kushika nafasi hii baada ya Barbara Gonzalez, Zubeda Sakuru anakabiliwa na deni la kulinganisha mafanikio yake na yale ya mtangulizi wake.

Barbara Gonzalez, aliyekuwa CEO wa klabu hiyo, alifanikiwa kuinua hadhi ya Simba kimataifa kwa kusimamia kampeni mbalimbali za kuimarisha klabu kifedha na kuongeza umaarufu wake. Chini ya uongozi wake, Simba ilifanikiwa kuvutia udhamini mkubwa, kuimarisha miundombinu, na kuleta wachezaji wa kiwango cha juu. Hii inampa Zubeda jukumu kubwa la kuhakikisha kuwa mafanikio hayo si tu yanaendelea bali pia yanavuka viwango vya zamani.

Changamoto nyingine kubwa kwa Zubeda ni kuhakikisha Simba inarejea kutawala ligi ya ndani baada ya kupoteza ubingwa wa Ligi Kuu ya Tanzania Bara kwa watani wao wa jadi Yanga SC. Pia, shinikizo la kuhakikisha timu inafanya vyema kwenye mashindano ya kimataifa kama Ligi ya Mabingwa Afrika ni kubwa mno na Ile ya Kombe la Shirikisho ambayo kwa sasa wapo katika hatua ya makundi na hii ni kuonesha namna gani anapaswa kushirikiana na wadau wote wa klabu ili kuhakikisha Simba inarejea kuwa klabu yenye mafanikio makubwa zaidi Afrika Mashariki na Kati.

Kama Kaimu CEO, Zubeda anatakiwa kuonyesha uwezo wa kusimamia timu na klabu kwa jumla katika nyanja zote. Hii ni pamoja na kutafuta vyanzo vipya vya mapato, kudumisha nidhamu ya kifedha, na kuboresha utendaji wa timu.

Jukumu kubwa litakuwa ni kuhakikisha klabu inavutia wadhamini wapya na kuboresha mikataba iliyopo. Wakati wa Barbara Gonzalez, Simba ilisaini mikataba kadhaa ya udhamini, ikiwemo ule wa Azam Media. Ili kufanikisha hilo, Zubeda anatakiwa kutumia ujuzi wake wa mawasiliano na uongozi kuendeleza mtandao wa ushirikiano wa kibiashara.

Pia, Zubeda ana jukumu la kuhakikisha Simba inaendelea kuwekeza katika miundombinu, kama vile Uwanja wa Mo Simba Arena bila kusahau kuboresha mifumo ya kiufundi na kisasa ya mafunzo ya wachezaji. Mafanikio ya muda mrefu ya klabu yanategemea uwekezaji wa aina hii na Zubeda anapaswa kushirikiana na wadau kuhakikisha malengo haya yanatimizwa.

Zaidi ya hayo, ni muhimu kwa Zubeda kuhakikisha kuwa mahusiano kati ya klabu na mashabiki yanaimarishwa. Mashabiki wa Simba ni miongoni mwa rasilimali muhimu zaidi za klabu hiyo, na kushirikisha kikamilifu mashabiki kwa njia ya kidijitali na matukio ya kijamii ni mkakati muhimu kwa mafanikio ya klabu.

Kumteua Zubeda Hassan Sakuru kama Kaimu CEO wa Simba SC ni hatua muhimu kwa klabu hiyo hasa wakati huu ambapo inajitahidi kurejea kileleni mwa soka la Tanzania na Afrika. Uteuzi wake unatoa ujumbe mzito kuhusu nafasi ya wanawake katika uongozi wa michezo huku ukionyesha dhamira ya Simba kuendelea kuwa mfano wa kuigwa katika uendeshaji wa soka la kisasa.

Pamoja na historia yake nzuri ndani ya klabu, Zubeda anakabiliwa na changamoto kubwa za kuhakikisha Simba inarudi kwenye enzi zake za mafanikio, hasa katika kukabiliana na ushindani wa watani wao wa jadi Yanga SC na timu zingine za kimataifa. Ikiwa atafanikiwa kutekeleza jukumu lake kwa ufanisi, Zubeda ana nafasi nzuri ya kuingia kwenye historia kama mmoja wa viongozi bora wa Simba SC, akifuata nyayo za Barbara Gonzalez na viongozi wengine waliotangulia.

Mashabiki wa Simba wanapaswa kuwa na imani na uongozi wake, huku wakimpa usaidizi wa dhati katika dhamira yake ya kuhakikisha Simba inarudi kileleni na kutamba katika medani ya soka. Uteuzi wake ni fursa mpya kwa klabu hiyo kuimarisha nafasi yake kama moja ya klabu kubwa zaidi barani Afrika.