Guardiola awashukuru Doku na Manchester City kwa ‘zawadi’ ya ushindi dhidi ya Liverpool
Kocha afikia mechi 1,000 za ukufunzi
Pep Guardiola alimpongeza Jérémy Doku na kuishukuru Manchester City kwa kumpa “zawadi ya kipekee” ya ushindi wa mabao 3-0 dhidi ya Liverpool, katika mchezo wake wa 1,000 kama meneja.
Bao la Erling Haaland, jingine la Nico González katika kipindi cha kwanza, na goli la kuvutia la Doku kutoka umbali wa yadi 20 baada ya mapumziko, yaliipeleka City ndani ya pointi nne tu nyuma ya vinara wa Ligi Kuu, Arsenal.
Kabla ya mapumziko, Virgil van Dijk alidhani amefunga, lakini goli lake lilikataliwa baada ya Andy Robertson kuonekana kuwa ameingilia mchezo akiwa mbele ya mlinda mlango wa City, Gianluigi Donnarumma.
Ushindi huo ulikuwa wa 716 kwa Guardiola katika maisha yake ya ukufunzi, na alisema:
“Nawashukuru wachezaji na benchi la ufundi kwa kunipa zawadi hii ya ajabu dhidi ya mpinzani muhimu zaidi niliyewahi kukutana naye hapa. Imebaki kuwa usiku maalum zaidi kwa kuwa watoto wangu walikuwepo kushuhudia.”
Kuhusu Doku, Guardiola alisema:
“Sidhani kama ataishia kuwa mfungaji bora, lakini anajituma sana uwanjani kwa kuboresha uwezo wake. Anasikiliza, ana sifa za kipekee za kupiga chenga, na alikuwa hatari sana, akiwa na mpira na bila mpira. Tumemsaidia kadiri tulivyoweza, na amecheza mechi bora kabisa.”
Mchezo huo ulikuwa wa 550 kwa Guardiola kama meneja wa City. Alipohojiwa kuhusu Arsenal kupoteza pointi dhidi ya Sunderland, alisema:
“Nilisema kwa wachezaji wangu tusifanye kazi kwa sababu Arsenal hawajashinda, bali tufanye kwa sababu tunaamini ndani yetu kwamba tunaweza kupambana na mabingwa wa England. Leo tumeonyesha hilo – hasa katika kipindi cha kwanza.”
Kwa upande wa Liverpool, kipigo hicho kilikuwa cha tano katika mechi zao sita za mwisho za ligi. Kocha Arne Slot alisema:
“Inaonekana kama tumepoteza mechi nyingi mno. Kwa sasa hatupaswi kufikiria kuhusu mbio za ubingwa; tunapaswa kuzingatia kupata matokeo mechi baada ya mechi. Wakati mzuri wa kutazama jedwali ni baada ya mechi 38, wakati mwingine ni baada ya michezo 19, kila timu ikishakutana mara moja.”
Slot pia alilalamikia goli la Van Dijk kukataliwa kwa madai ya Robertson kuwa offside:
“Ni wazi kabisa uamuzi ulikuwa wa makosa. Robertson hakuingilia kabisa kile ambacho kipa angeweza kufanya,” alisema.
Akaongeza:
“Baada ya mchezo, nilionyeshwa goli la City dhidi ya Wolves msimu uliopita ambapo mchezaji wa City alikuwa kwenye eneo lilelile na mwamuzi huyo huyo alilikubali. Leo, ilichukua sekunde 13 tu kwa mwamuzi msaidizi kuinua bendera – jambo linaloonyesha kulikuwa na mawasiliano fulani. Uamuzi huo ungeweza kubadilisha mchezo kwa faida yetu.”
