Jamhuri ya Kidemokrasia ya Congo (DR Congo) imeandika historia kwa kufuzu kwa mara ya kwanza hatua ya 32 bora ya Kombe la Dunia baada ya kuichapa Uzbekistan mabao 3-1 katika mchezo wa kusisimua.
Shujaa wa usiku alikuwa Yoane Wissa, aliyefunga mabao mawili na kuiongoza DR Congo kupata ushindi wake wa kwanza kabisa katika historia ya Kombe la Dunia. Ushindi huo umeiwezesha timu hiyo kupanga miadi na England katika hatua ya mtoano.
Uzbekistan walifungua pazia la mabao kupitia nahodha wao Eldor Shomurodov, aliyemloba kipa Lionel Mpasi kwa ustadi mkubwa baada ya bao la mapema kukataliwa kwa kuotea.
DR Congo walionyesha moyo wa kupambana na kusawazisha kupitia penalti ya Wissa, baada ya beki Abdukodir Khusanov kumwangusha mshambuliaji huyo ndani ya eneo la hatari.
Dakika mbili baadaye, Fiston Mayele aliwapa Wakongo bao la pili kwa kumuwahi kipa Abduvohid Nematov na kuamsha shangwe kubwa kutoka kwa maelfu ya mashabiki waliokuwa uwanjani.
Katika dakika za nyongeza, Wissa alihitimisha ushindi huo kwa shuti kali lililojaa ustadi na kuifanya DR Congo kusherehekea usiku wa kihistoria.
Kocha wa DR Congo, Sébastien Desabre, amesema maandalizi ya kukabiliana na England yataanza mara moja.
“Tunao wachezaji wanaocheza England na watatusaidia kuelewa wapinzani wetu. Tutajiandaa kwa umakini kwa mechi hii kubwa,” alisema Desabre.
Kwa upande wake, kocha wa Uzbekistan, Fabio Cannavaro, alisema Kombe la Dunia halina huruma.
“Wachezaji wangu walipambana hadi mwisho. Wamevunjika moyo kwa sababu walitamani kuipa nchi yao ushindi wa kihistoria,” alisema.
AFRIKA YAENDELEA KUNG’ARA
Mafanikio ya DR Congo yanaongeza idadi ya mataifa ya Afrika yaliyofuzu hatua ya 32 bora, yakionyesha nguvu ya bara hilo katika Kombe la Dunia la mwaka huu. Ni Tunisia pekee waliokwishaaga mashindano, huku Algeria wakisubiri matokeo ya mchezo wao wa mwisho wa makundi ili kujaribu kuungana na wenzao.
Sasa macho yote yataelekezwa kwenye pambano la England dhidi ya DR Congo, ambapo Wakongo watakuwa na nafasi ya kuandika historia nyingine dhidi ya moja ya vigogo wa soka duniani.
